‘കൊല്ലും എന്ന വാക്ക്… കാക്കും എന്ന പ്രതിജ്ഞ’ എന്ന തലക്കെട്ടോടുകൂടി പൃഥ്വിരാജ് പ്രൊഡക്ഷന്റെ പുതിയ ചിത്രത്തിന്റെ പേര് പ്രഖ്യാപിച്ചു . പൃഥ്വിരാജ് തന്നെ നായക വേഷത്തിലെത്തുന്ന ചിത്രത്തിന് ‘കുരുതി’ എന്നാണ് പേരിട്ടിരിക്കുന്നത്. പൃഥ്വി തന്നെയാണ് തന്റെ സോഷ്യല്‍ മീഡിയ പേജുകളില്‍ സിനിമയുടെ ടൈറ്റില്‍ പോസ്റ്റര്‍ പങ്കുവെച്ചത്. സുപ്രിയ മേനോന്‍ നിര്‍മ്മിക്കുന്ന ചിത്രം മനു വാര്യരാണ് സംവിധാനം നിര്‍വഹിക്കുന്നത്.
പൃഥ്വിക്കൊപ്പം സിനിമയില്‍ ഷൈന്‍ ടോം ചാക്കോ, ശ്രിന്ദ, മുരളി ഗോപി, മാമുക്കോയ, റോഷന്‍ മാത്യൂ, നവാസ് വളളിക്കുന്ന്, മണികണ്ഠന്‍ ആചാരി, നസ്ലന്‍, സാഗര്‍ സൂര്യ തുടങ്ങിയവരും പ്രധാന വേഷങ്ങളില്‍ എത്തുന്നു.ഡിസംബര്‍ ഒമ്ബതിനാണ് കുരുതിയുടെ ചിത്രീകരണം ആരംഭിക്കുകയെന്നും പൃഥ്വി സമൂഹ മാധ്യമങ്ങളിലൂടെ അറിയിച്ചു. അതേസമയം ചിത്രം സാമൂഹിക രാഷ്ട്രീയ ത്രില്ലറാകും എന്ന സൂചനകളാണ് പുറത്തുവരുന്നത്. അഭിനന്ദന്‍ രാമാനുജം ഛായാഗ്രഹണം നിര്‍വ്വഹിക്കുന്ന സിനിമയ്ക്ക് ജേക്ക്‌സ് ബിയോയ് സംഗീതവും റഫീഖ് അഹമ്മദ് ഗാനരചനയും നിര്‍വ്വഹിക്കുന്നു.
കുരുതിക്ക് പുറമെ കോള്‍ക്ക് കേസും പൃഥ്വിയുടെതായി അണിയറയില്‍ ഒരുങ്ങുന്ന പുതിയ ചിത്രമാണ്. സിനിമയില്‍ എസിപി സത്യജിത്ത് എന്ന കഥാപാത്രത്തെയാണ് നടന്‍ അവതരിപ്പിക്കുന്നത്. അദിതി ബാലന്‍ നായികയാവുന്ന സിനിമ തനു ബാലക് സംവിധാനം ചെയ്യുന്നു. കോള്‍ഡ് കേസിന്റെ ചിത്രീകരണം നിലവില്‍ തിരുവനന്തപുരത്താണ് പുരോഗമിച്ചുകൊണ്ടിരിക്കുന്നത്.
