മലയാളി പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന മോഹന്‍ലാല്‍ ചിത്രമാണ് ആറാട്ട്. വില്ലന് ശേഷം മോഹന്‍ലാല്‍- ബി ഉണ്ണികൃഷ്ണന്‍ ടീം ഒന്നിക്കുന്ന ചിത്രമാണിത്.മോഹന്‍ ലാല്‍ നെയ്യാറ്റിന്‍കര ഗോപന്‍ ആയെത്തുന്ന ചിത്രത്തിന്റെ ഫസ്റ്റ് ലുക്ക് നേരത്തെ പുറത്ത് വിട്ടിരുന്നു. വിന്‍റേജ് ബെന്‍സ് കാറിന്‍റെ ഡോര്‍ തുറന്ന് പുറത്തെക്കിറങ്ങുന്ന മോഹന്‍ലാലിന്റെ പിന്നില്‍ നിന്നുള്ള ദൃശ്യമായിരുന്നു ഫസ്റ്റ് ലുക്ക് പോസ്റ്ററില്‍.
എന്നാല്‍ ഇപ്പോള്‍ പങ്കുവെച്ച ചിത്രത്തില്‍ കാറിന്‍റെ ഡോര്‍ തുറന്ന് പുറത്തെക്കിറങ്ങുന്ന രീതിയില്‍ കഥാപാത്രത്തിന്‍റെ മുഖം വ്യക്തമാക്കുന്നതായിട്ടാണുള്ളത്. ചുവപ്പ് നിറത്തിലുള്ള ഫുള്‍സ്ലീവ് ഷര്‍ട്ടും സണ്‍ഗ്ലാസുമൊക്കെ ധരിച്ച്‌ സ്റ്റൈലിഷ് ലുക്കിലാണ് ‘ഗോപന്‍’.മോഹന്‍ലാലിന്റെ നെയ്യറ്റിന്‍കര ഗോപനായിട്ടുള്ള ലുക്ക് സോഷ്യല്‍ മീഡിയയില്‍ വൈറലായിട്ടുണ്ട്.
2021 ല്‍ ഓണം റിലീസായി തീയറ്ററുകളില്‍ എത്തുമെന്ന് പ്രതീക്ഷിക്കുന്ന ചിത്രം ഒരു മാസ്സ് പടമായിരിക്കുമെന്ന കാര്യത്തില്‍ സംശയമില്ല.പാലക്കാടില്‍ ചിത്രീകരണം നടക്കുന്ന ചിത്രത്തില്‍ ഐഎഎസ് ഓഫീസര്‍ ആയി ശ്രദ്ധ ശ്രീനാഥും എത്തുന്നുണ്ട്. അശ്വിന്‍ കെ കുമാര്‍, സിദ്ദിഖ്, സായികുമാര്‍, രചന നാരായണന്‍കുട്ടി എന്നിവരാണ് മറ്റു താരങ്ങള്‍. കോവിഡ് പ്രോട്ടോകോള്‍ പാലിച്ച്‌ ചിത്രീകരിക്കുന്ന ചിത്രത്തിന്റെ ബഡ്ജറ്റ് 15 കോടി രൂപയാണ്. മരക്കാര്‍: അറബിക്കടലിന്റെ സിംഹം, ദൃശ്യം 2 എന്നിവയാണ് മോഹന്‍ ലാലിന്റേതായി പുറത്തിറങ്ങാനിരിക്കുന്ന പുതിയ ചിത്രങ്ങള്‍.
