മമ്മൂട്ടിയെ നായകനാക്കി അമല്‍ നീരദ് സംവിധാനം ചെയ്യുന്ന പുതിയ ചിത്രത്തിന്റെ പേര് ‘ഭീഷ്മ പര്‍വ്വം’. ‘ബിലാലി’നു മുന്‍പ് അമല്‍ നീരദ് ഒരുക്കുന്ന മറ്റൊരു ചിത്രത്തില്‍ മമ്മൂട്ടി നായകനാവുമെന്ന് റിപ്പോര്‍ട്ടുകള്‍ ഉണ്ടായിരുന്നെങ്കിലും അതില്‍ ഔദ്യോഗിക പ്രതികരണങ്ങളൊന്നും എത്തിയിരുന്നില്ല. ഫസ്റ്റ് ലുക്ക് പോസ്റ്ററിനൊപ്പമാണ് മമ്മൂട്ടി ഇപ്പോള്‍ സിനിമ പ്രഖ്യാപിച്ചിരിക്കുന്നത്.മുടി നീട്ടി വളർത്തി താടിയിൽ മാസ് ലുക്കിലാണ് മെഗാസ്റ്റാർ പോസ്റ്ററിൽ പ്രത്യക്ഷപ്പെട്ടിരിക്കുന്നത്.ലോക്ക് ഡൗണ്‍ കാലത്തെ താടിയും മുടിയും നീട്ടിയ മമ്മൂട്ടിയുടെ ലുക്ക് പലകുറി സോഷ്യല്‍ മീഡിയയില്‍ തരംഗം സൃഷ്ടിച്ചിരുന്നു. അത് ഈ ചിത്രത്തിലെ കഥാപാത്രത്തിന്‍റെ ഗെറ്റപ്പിനുവേണ്ടിയായിരുന്നു.
നേരത്തെ മമ്മൂട്ടിയും അമല്‍ നീരദും ഒരുമിക്കുന്ന ‘ബിലാല്‍’ ആയിരുന്നു പ്രഖ്യാപിച്ചിരുന്നത്. ഹിറ്റ് ചിത്രം ബിഗ് ബിയുടെ രണ്ടാം പതിപ്പായിരുന്നു ബിലാല്‍. ലോക്ക് ഡൗണ്‍ കാരണം ചിത്രീകരണം മാറ്റിവയ്ക്കുകയായിരുന്നു. 14 വര്‍ഷങ്ങള്‍ക്ക് ശേഷമാണ് താരവും സംവിധായകനും സിനിമ പ്രഖ്യാപിച്ചത്. ബിഗ് ബജറ്റില്‍ ഒരുങ്ങുന്ന ചിത്രം കൊവിഡ് സാഹചര്യം പൂര്‍ണമായി മാറാത്ത സാഹചര്യത്തിലാണ് മാറ്റി വച്ചത്.
രവിശങ്കര്‍, ദേവദത്ത് ഷാജി, ആര്‍ ജെ മുരുകന്‍ എന്നിവര്‍ ചേര്‍ന്നാണ് തിരക്കഥ. ഷൈന്‍ ടോം ചാക്കോ, സൗബിന്‍ ഷാഹിര്‍, ശ്രീനാഥ് ഭാസി, അബു സലിം തുടങ്ങിയവര്‍ ചിത്രത്തില്‍ കഥാപാത്രങ്ങളെ അവതരിപ്പിക്കുന്നുണ്ട്. കൊച്ചിയാവും പ്രധാന ലൊക്കേഷന്‍.
