ഗ്രെയ്ന്‍സ് ഓഫ് സ്റ്റാര്‍ഡസ്റ്റ് എന്ന വിസ്മയ മോഹന്‍ലാലിന്‍റെ പുസ്തകം പരിചയപ്പെടുത്തി ദുല്‍ഖര്‍ സല്‍മാന്‍. കൂട്ടത്തില്‍ ഒരു രസകരമായ കഥയും ദുല്‍ഖര്‍ പങ്കു വെക്കുന്നു. പിറന്നാള്‍ ദിനത്തില്‍ ആഘോഷം നടക്കുമ്പോള്‍ ഉറങ്ങിപ്പോയ പിറന്നാളുകാരിയുടെ കഥ. വാലന്‍റെെന്‍സ് ദിനമായ ഫെബ്രുവരി 14 നാണ് പുസ്തകം പുറത്തിറങ്ങിയത്. തന്‍റെ പുസ്തകത്തിന്‍റെ ഒരു കോപ്പി വിസ്മയ തന്നെയാണ് ദുല്‍ഖറിന് അയച്ച് കൊടുത്തത്.
പുസ്തകത്തിനെ പരിചയപ്പെടുത്തി ദുല്‍ഖറിന്‍റെ പോസ്റ്റ് ഇപ്രകാരം ആയിരുന്നു. ”എന്‍റെ ആ പഴയ മനോഹരമായ ഓര്‍മ്മകളില്‍ മായയെക്കുറിച്ച് ഓര്‍ക്കുമ്പോള്‍ ആദ്യമെത്തുന്നത് അവളുടെ ആദ്യ ജന്മദിന രാത്രിയാണ്. ചെന്നെെയിലെ താജ് ഹോട്ടലില്‍ വെച്ചായിരുന്നു. മനോഹരമായ ഗോള്‍ഡന്‍ ഉടുപ്പില്‍ സുന്ദരിയായ അവള്‍ക്കായി അവളുടെ അച്ഛനും അമ്മയും മനോഹരമായ പാര്‍ട്ടി തന്നെയാണ് ഒരുക്കിയത്‌. എന്നാല്‍ കുറച്ച് കഴിഞ്ഞപ്പോള്‍ പിറന്നാളുകാരിയെ കാണാനില്ല. ഏവരും അന്വോഷിച്ചപ്പോഴാണ് അവളുടെ അമ്മ പിന്നീട് വന്നു പറഞ്ഞു മായ ഉറങ്ങിയെന്ന്.
അത്രയും വലിയ പാര്‍ട്ടിക്കിടെ ഉറങ്ങി പോയ പിറന്നാളുകാരിയെ ഞാന്‍ ഓര്‍ക്കാറുണ്ട്.അവളിന്ന് വളര്‍ന്നു, തന്‍റേതായ വഴി കണ്ടെത്തി, ചെറു പ്രായത്തില്‍ തന്നെ ഒരെഴുത്തുകാരി ആയി. പ്രായത്തിനും മുകളിലാണ് അവളുടെ ചിന്തകളും കലയും. അവളുടെ അനുഭവം, വളര്‍ച്ച എന്നിവയുടെ ഉള്‍ക്കാഴ്ച്ച ഈ പുസ്തകം തരുന്നു. എല്ലാ ആശംസകളും മായ, നീ അഭിമാനമാണ്. സ്നേഹത്തോടെ ചാലുചേട്ടന്‍.”
