ഷാജി കൈലാസ് എട്ട് വർഷത്തെ ഇടവേള അവസാനിപ്പിച്ച് പൃഥ്വിരാജിനെ നായകനാക്കി ഒരുക്കുന്ന ചിത്രമാണ് ‘കടുവ’.’കടുവക്കുന്നേല്‍ കുറുവച്ചന്‍’ എന്ന കഥാപാത്രമായാണ് പൃഥ്വി ചിത്രത്തില്‍ എത്തുന്നത്. കഥാപാത്രത്തിന്‍റെ അപ്പിയറന്‍സിലുള്ള ആദ്യ സ്റ്റില്‍ പൃഥ്വിയും ഷാജി കൈലാസും സോഷ്യല്‍ മീഡിയയിലൂടെ പങ്കുവച്ചിട്ടുണ്ട്.
അതേസമയം വിവേക് ഒബ്റോയിയാണ് ചിത്രത്തിൽ വില്ലനായി എത്തുന്നതെന്നാണ് റിപ്പോർട്ട്. ലൂസിഫറില്‍ ബോബിയായെത്തിയതിന് പിന്നാലെ വീണ്ടും പൃഥ്വിക്കൊപ്പം പ്രവര്‍ത്തിക്കാനുള്ള അവസരം കിട്ടുകയാണ് താരത്തിന്. വില്ലനായാണ് മലയാളത്തിലേക്ക് എത്തിയതെങ്കിലും ഗംഭീര സ്വീകരണമായിരുന്നു വിവേകിന് ലഭിച്ചത്. നടന്‍ വിനീതായിരുന്നു വിവേകിന് ശബ്ദം നല്‍കിയത്. രണ്ടാമത്തെ മലയാള ചിത്രത്തിലും വില്ലന്‍ വേഷമാണ് താരത്തിനെന്നുള്ള റിപ്പോര്‍ട്ടുകളുമുണ്ട്.
ചിത്രത്തിൽ പൃഥ്വിരാജ് അവതരിപ്പിക്കുന്ന കഥാപാത്രത്തിൻ്റെ മകളായി എത്തുന്നത് മിനിസ്‌ക്രീനിലെ കുരുന്ന് മാലാഖയായി ശ്രദ്ധ നേടിയ കുഞ്ഞ് വൃദ്ധി വിശാലാണ്.മുണ്ടക്കയത്ത് ചിത്രീകരണം പുരോഗമിക്കുന്ന കടുവയില്‍ സായ് കുമാര്‍, സിദ്ദിഖ്, ജനാര്‍ദ്ദനന്‍, വിജയരാഘവന്‍, അജു വര്‍ഗീസ്, ഹരിശ്രീ അശോകന്‍, രാഹുല്‍ മാധവ്, കൊച്ചുപ്രേമന്‍, സംയുക്ത മേനോന്‍, സീമ, പ്രിയങ്ക തുടങ്ങിയവര്‍ മറ്റു വേഷങ്ങളില്‍ എത്തുന്നു. പൃഥ്വിരാജ് പ്രൊഡക്ഷന്‍സും ലിസ്റ്റിന്‍ സ്റ്റീഫന്‍റെ മാജിക് ഫ്രെയിംസും ചേര്‍ന്നാണ് നിര്‍മ്മാണം.
