അല്ലു അര്ജുന്-പൂജ ഹെഗ്‌ഡെ താരജോഡികളുടെ ‘ബുട്ട ബൊമ്മ’ ഗാനം യൂട്യൂബില്‍ 450 മില്ല്യണ്‍ കാഴ്ചക്കാരെ പിന്നിട്ടു. ‘അങ്ങ് വൈകുണ്ഡാപുരത്ത്’ എന്ന ചിത്രത്തിലേതാണ് ഗാനം. അല്ലു അര്ജുന് വമ്പന്‍ തിരിച്ചുവരവൊരുക്കി ശ്രദ്ധ നേടിയിരുന്നു ചിത്രം. രാമജോഗയ്യ ശാസ്ത്രിയുടെ വരികള്‍ക്ക് തമന്‍ എസ് ആണ് സംഗീതം നല്‍കിയിരിക്കുന്നത്.
450 മില്ല്യണ്‍ കാഴ്ചക്കാരിലേക്കെത്തിയതിന് പിന്നാലെ സന്തോഷവാര്‍ത്ത പങ്കിട്ട് സ്പെഷ്യല്‍ പോസ്റ്ററും അണിയറപ്രവര്‍ത്തകര്‍ പുറത്തിറക്കി. അല്ലു അര്‍ജ്ജുനും ഗായകന്‍ അര്‍മാന്‍ മാലികിനും നന്ദി പറഞ്ഞ് സംഗീത സംവിധായകന്‍ തമനാണ് പോസ്റ്റര്‍ പുറത്ത് വിട്ടത്.
ഫെബ്രുവരിയിലാണ് ബുട്ടബൊമ്മ പുറത്തിറങ്ങിയത്. ശില്‍പ ഷെട്ടി, സിമ്രന്‍ തുടങ്ങി പ്രമുഖരുള്‍പ്പെടെ പലരും പാട്ടിനൊപ്പം ചുവടു വച്ച്‌ വിഡിയോകള്‍ പോസ്റ്റ് ചെയ്തു. ഇതെല്ലാം വൈറലായതിന് പിന്നാലെ ഓസ്ട്രേലിയന്‍ ക്രിക്കറ്റ് താരങ്ങളായ ഡേവിഡ് വാര്‍ണറും കെവിന്‍ പീറ്റേഴ്സനും പാട്ടിനൊപ്പം ചുവടുവച്ചതിന്റെ വിഡിയോ സോഷ്യല്‍മീഡിയ ഏറ്റെടുത്തിരുന്നു.
ത്രിവിക്രം ശ്രീനിവാസ് സംവിധാനം ചെയ്ത ‘അല വൈകുണ്ഠപുരമുലോ’യില്‍ അല്ലുവിനും പൂജ ഹെഗ്ഡെയ്ക്കുമൊപ്പം ജയറാം, തബു, സമുദ്രക്കനി, ഗോവിന്ദ് പത്മസൂര്യ എന്നിവരാണ് പ്രധാനവേഷങ്ങളില്‍ എത്തിയത്.
