കുഞ്ചാക്കോ ബോബന്‍ പ്രധാന വേഷത്തില്‍ എത്തിയ ത്രില്ലര്‍ ചിത്രം അഞ്ചാം പാതിര സിനിമ പ്രേമികളുടെ കയ്യടി നേടിയിരുന്നു.മിഥുന്‍ മാനുവല്‍ തോമസായിരുന്നു ചിത്രത്തിന്റെ സംവിധാനം. ഇപ്പോള്‍ ഇതാ മറ്റൊരു ത്രില്ലറുമായി വീണ്ടും ഞെട്ടിക്കാന്‍ എത്തുകയാണ് അഞ്ചാം പാതിര ടീം. കുഞ്ചാക്കോ ബോബന്‍ തന്നെയാണ് സന്തോഷവാര്‍ത്ത ആരാധകരുമായി പങ്കുവെച്ചത്.
മിഥുന്‍ മാനുവല്‍ തോമസിനും ചിത്രത്തിന്റെ നിര്‍മാതാവ് ആഷിക് ഉസ്മാനുമൊപ്പം നില്‍ക്കുന്ന ചിത്രമാണ് താരം സോഷ്യല്‍ മീഡിയയില്‍ പോസ്റ്റ് ചെയ്തത്. ‘ത്രില്ലര്‍ ബോയ്സ് വീണ്ടുമെത്തുകയാണ്. മറ്റൊരു ത്രില്ലിങ് അനുഭവത്തിനായി ദൈവം സന്നദ്ധനാണ്. ചിലപ്പോള്‍ അവസാനം ഒരു തുടക്കം മാത്രമായിരുന്നിരിക്കാം’, കുഞ്ചാക്കോ ബോബന്‍ കുറിച്ചു .അതേസമയം അഞ്ചാം പാതിര കഴിഞ്ഞ സ്ഥിതിയ്ക്ക് എന്നായിരുന്നു മിഥുന്‍ മാനുവല്‍ തോമസ് കുറിച്ചത്. അഞ്ചാം പാതിരയ്ക്ക് ശേഷം മറ്റൊരു ത്രില്ലറുമായി ഞങ്ങള്‍ തിരികെ എത്തുന്നുവെന്നാണ് അഞ്ചാം പാതിരയുടെ നിർമ്മാതാവായ ആഷിക് ഉസ്മാന്‍ പറഞ്ഞത്.
പോസ്റ്റുകള്‍ സോഷ്യല്‍ മീഡിയയില്‍ വെെറലായി മാറുകയാണ്. അഞ്ചാം പാതിരയുടെ രണ്ടാം ഭാഗമാണെന്ന സംശയവും ചിലര്‍ പങ്കുവയ്‌ക്കുന്നുണ്ട്. കൂടാതെ അഞ്ചാം പാതിരയുടെ ഹിന്ദി റീമേക്ക് വരുന്നതിന്റെ റിപ്പോര്‍ട്ടുകള്‍ നേരത്തെ വന്നിരുന്നു. സംവിധായകന്‍ മിഥുന്‍ മാനുവല്‍ തന്നെയാണ് ചിത്രം സംവിധാനം ചെയ്യുന്നത്. ഹിന്ദി റീമേക്കിന്റെ നിര്‍മാണം റിലയന്‍സ് എന്റര്‍ടെയിന്‍മെന്റും ആഷിക്ക് ഉസ്മാനും ചേര്‍ന്നാണ് നിര്‍വഹിക്കുന്നത്.
