അങ്കമാലി ഡയറീസ്, സ്വാതന്ത്ര്യം അര്‍ദ്ധരാത്രിയില്‍, ജല്ലിക്കട്ട് തുടങ്ങിയ സിനിമകളിലൂടെ ശ്രദ്ധ നേടിയ ആന്റണി വര്‍ഗീസ് (പെപ്പെ) നായകനാകുന്ന ചിത്രമാണ് അജഗജാന്തരം.സ്വാതന്ത്ര്യം അര്‍ദ്ധരാത്രിയ്ക്കു ശേഷം ടിനു പാപ്പച്ചന്‍ സംവിധാനം ചെയ്യുന്ന ‘അജഗജാന്തരം’ എന്ന ചിത്രത്തിന്റെ ടൈറ്റിൽ പോസ്റ്റർ നടന്‍ ടൊവിനോ തോമസിന്റെ ഫേസ്ബുക് പേജ് വഴി പുറത്തിറക്കി.
ആന്റണി പെപ്പെയുടെ കരിയറിലെ ഏറ്റവും വലിയ മുതല്‍ മുടക്കുള്ള ചിത്രം കൂടിയായ ‘അജഗജാന്തരം’ നിര്‍മ്മിക്കുന്നത് സില്‍വര്‍ ബേ പ്രൊഡക്ഷന്‍സിന്റെ ബാനറില്‍ എമ്മാനുവല്‍ ജോസഫും അജിത് തലാപ്പിള്ളിയും ആണ്. വീനിത് വിശ്വം,കിച്ചു ടെല്ലാസ് എന്നിവരുടെ രചനയില്‍ ഒരുങ്ങുന്ന ബിഗ് ബഡ്ജറ്റ് ചിത്രത്തില്‍ ആന്റണി വര്‍ഗ്ഗീസിനൊപ്പം അര്‍ജുന്‍ അശോകന്‍,ചെമ്ബന്‍ വിനോദ് ജോസ്,ലൂക്മാന്‍,സുധി കോപ്പ,അനില്‍ നെടുമങ്ങാട്,സാബുമോന്‍, ജാഫര്‍ ഇടുക്കി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ഉത്സവപ്പറമ്പിലേക്ക് ഒരു ആനയും പാപ്പാനും എത്തുന്നതും തുടര്‍ന്നവിടെ 24 മണിക്കൂറിനുള്ളില്‍ നടക്കുന്ന ആകാംഷ നിറഞ്ഞ സംഭവങ്ങള്‍ നര്‍മ്മത്തിന്റെ മേമ്പടിയോടെ ചിത്രത്തില്‍ അവതരിപ്പിക്കുന്നു.ഫെബ്രുവരി 26ന് ചിത്രം തീയറ്ററുകളില്‍ എത്തും.
