ബ്രഹ്മാണ്ഡ ചിത്രമായ ബാഹുബലിയുടെ പ്രീക്വൽ ‘ബിഫോര്‍ ദി ബിഗിനിംഗ്’ എന്ന പുതിയ വെബ് സീരീസില്‍, വാമിഖ ഗബ്ബിയാണ് ശിവഗാമി ദേവിയുടെ റോളില്‍ എത്തുന്നത്. എസ്‌എസ് രാജമൗലിയുടെ ബാഹുബലി ഫ്രാഞ്ചൈസിയുടെ പ്രീക്വലിൽ ശിവഗാമിയുടെ വേഷം അവതരിപ്പിക്കാന്‍ താരം തയ്യാറെടുക്കുകയാണ്.
ഇതിനോടനുബന്ധിച്ച് വാമിക വാള്‍ പയറ്റ് പരിശീലനവും ആരംഭിച്ചു. ആ വീഡിയോയാണ് താരം ഇപ്പോൾ പുറത്തു വിട്ടിരിക്കുന്നത്.
ആനന്ദ് നീലകണ്ഠന്റെ പുസ്തകങ്ങള്‍ – ദി റൈസ് ഓഫ് ശിവഗാമി, ചതുരംഗ, മഹിഷ്മതി രാജ്ഞി എന്നിവയെ അടിസ്ഥാനമാക്കിയാണ് വെബ് സീരിസ് ഒരുങ്ങുന്നത്. ദേവ കട്ടയും ആനന്ദ് നീലകണ്ടനും ചേർന്ന് ഒരുക്കിയ തിരക്കഥക്ക് സംവിധാനം നിർവഹിക്കുന്നത് ദേവ കട്ടയും പ്രവീൺ സറ്റാരുവും ചേർന്നാണ്. പരമ്പര നെറ്റ്ഫ്ലിക്സിലാണ് സ്ട്രീം ചെയ്യുക.
ബാഹുബലി: ദി ബിഗിനിംഗ്, ബാഹുബലി 2: കണ്‍ക്ലൂഷന്‍ എന്നീ രണ്ട് സിനിമകളില്‍ രമ്യ കൃഷ്ണന്‍ ആയിരുന്നു ശിവഗാമി ദേവിയുടെ വേഷം അവതരിപ്പിച്ചത്. ഈ കഥാപാത്രത്തിന്റെ സംഭവബഹുലമായ ജീവിതം വിവരിക്കുകയാണ് സീരീസിൽ.
നേരത്തെ, വെബ് സീരീസില്‍ യുവ ശിവഗാമിയായി അഭിനയിക്കാന്‍ മൃണാല്‍ താക്കൂറിനെ സമീപിച്ചിരുന്നു. എന്നാല്‍ അവര്‍ ഈ വെബ് സീരിസില്‍ നിന്ന് പിന്മാറിയപ്പോള്‍, നിര്‍മ്മാതാക്കള്‍ വാമിക ഗബ്ബിയെ ഈ റോളിലേക്ക് തീരുനാനിക്കുകയായിരുന്നു.
ഗോദ എന്ന ബേസിൽ ജോസഫ് ചിത്രത്തിലൂടെ വാമിക മലയാളികൾക്കും ഏറെ സുപരിചിതയാണ്.
