അഞ്ചാം പാതിര ടീം വീണ്ടും ഒന്നിക്കുന്ന ചിത്രത്തിന് ആറാം പാതിരാ എന്നു പേരിട്ടു. മിഥുന്‍ മാനുവേല്‍ തോമസ് സംവിധാനം ചെയ്യുന്ന ചിത്രത്തില്‍ ഡോ. അന്‍വര്‍ ഹുസൈന്‍ എന്ന കഥാപാത്രമായി കുഞ്ചാക്കോബോബന്‍ പ്രത്യക്ഷപ്പെടുന്ന പോസ്റ്റര്‍ സംവിധായകന്‍ പങ്കുവച്ചു.അഞ്ചാം പാതിര റിലീസ് ചെയ്ത് ഒരു വര്‍ഷം പൂര്‍ത്തിയായ വേളയിലാണ് ചിത്രം പ്രഖ്യാപിച്ചിരിക്കുന്നത്.അന്‍വര്‍ ഹുസൈന്‍ പുതിയ ഒരു നിഗൂഢതയിലേക്ക് കാലെടുത്ത് വെക്കുന്നു എന്നാണ് സിനിമയെ കുറിച്ച് മിഥുന്‍ മാനുവല്‍ കുറിച്ചത്. പുതിയ കേസും പുതിയ നിഗൂഢതകളുമായിട്ടാണ് സിനിമ എത്തുന്നതെന്നും സംവിധായകന്‍ അറിയിച്ചു.
മുഴുനീള ക്രൈം ത്രില്ലറായ അഞ്ചാം പാതിര പ്രേക്ഷകരെ ആകാംക്ഷയുടെ മുള്‍മുനയില്‍ നിര്‍ത്തുകയായിരുന്നു.അഞ്ച് ആഴ്ചകള്‍ കൊണ്ട് അമ്പത് കോടി കളക്ഷന്‍ നേടി അഞ്ചാം പാതിര 2020ലെ മലയാളസിനിമയിലെ ആദ്യ ബ്ലോക്ബസ്റ്ററായി മാറുകയും ചെയ്തു.
ആഷിക്ക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക്ക് ഉസ്മാന്‍ തന്നെയാണ് രണ്ടാംഭാഗവും നിര്‍മിക്കുന്നത്. ചിത്രത്തിന് ഷൈജു ഖാലിദാണ് ഛായാഗ്രഹണം നടത്തുന്നത്. സുഷിന്‍ ശ്യാമം സംഗീതവും ഷൈജു ശ്രീധരന്റെ എഡിറ്റിങും നിര്‍വഹിക്കും.
