ആരാധകര്‍ ഏറെ കാത്തിരിക്കുന്ന വിക്രം ചിത്രം കോബ്രയുടെ സെക്കന്റ് ലുക്ക് പോസ്റ്റര്‍ ക്രിസ്മസ് ദിനത്തിൽ പുറത്തുവിട്ടു.ഡിമോന്റെ കോളനി, ഇമൈക്ക നൊടികള്‍ എന്നീ ഹിറ്റ് ചിത്രങ്ങളൊരുക്കിയ അജയ് ജ്ഞാനമുത്തുവാണ് ചിത്രം സംവിധാനം ചെയ്തിരിക്കുന്നത്.
സെക്കന്റ് ലുക്കില്‍ ചുറ്റിനും സംഖ്യകളാല്‍ തീര്‍ത്ത വലയവുംവളരെ തീവ്രമായ രൂപത്തിലുള്ള വിക്രമിനെ കാണാം.’എല്ലാ പ്രശ്‌നങ്ങള്‍ക്കും ഒരു ഗണിതശാസ്ത്ര പരിഹാരമുണ്ട്’, എന്ന അടിക്കുറിപ്പും പോസ്റ്ററിൽ കാണാം.
കോബ്രയില്‍ വിക്രമിന്റെ 20 ലധികം ലുക്കുകള്‍ ഉണ്ടെന്നാണ് സൂചന. അതിൽ ഫെബ്രുവരിയില്‍ പുറത്തിറങ്ങിയ ഫസ്റ്റ് ലുക്ക് പോസ്റ്ററില്‍ വിക്രമിന്റെ ഏഴ് ലുക്കുകള്‍ വെളിപ്പെടുത്തിയിരുന്നു. കൂടാതെ ഒക്ടോബറിലെ ഇര്‍ഫാന്‍ പത്താന്റെ ജന്മദിനത്തില്‍, കോബ്രയില്‍ അദ്ദേഹത്തിന്റെ ലുക്കും പുറത്തിറങ്ങിയിരുന്നു.
അസ്ലാന്‍ യില്‍മാസ് എന്ന വില്ലന്‍ കഥാപാത്രത്തെയാണ് പത്താന്‍ ചിത്രത്തില്‍ അവതരിപ്പിക്കുന്നത്.കെ എസ് രവികുമാര്‍, ശ്രീനിധി ഷെട്ടി, മൃണാളിനി, പത്മപ്രിയ , ബാബു ആന്റണി എന്നിവരും ചിത്രത്തിൽ വേഷമിടുന്നുണ്ട്.
