വിക്രമിനെ നായകനാക്കി ആർ അജയ് ജ്ഞാനമുത്തു സംവിധാനം ചെയ്യുന്ന ‘കോബ്ര’യുടെ ടീസർ പുറത്തിറങ്ങി.വിക്രം ഏഴ് ഗെറ്റപ്പുകളിൽ എത്തുന്ന ചിത്രത്തിന്റെ ടീസർ ആരാധകരെ ആവേശം കൊള്ളിക്കുന്നതാണ്.
ക്രിക്കറ്റ് താരം ഇർഫാൻ പത്താനാണ് ചിത്രത്തിൽ വില്ലൻ വേഷത്തിലെത്തുന്നത്. മലയാള നടൻ റോഷൻ മാത്യുവും പ്രധാന വേഷത്തിൽ ചിത്രത്തിലെത്തുന്നു.
‘എല്ലാ പ്രശ്‌നങ്ങള്‍ക്കും മാത്തമാറ്റിക്കല്‍ പരിഹാരമുണ്ട്’ എന്ന ടാഗ് ലൈനുമായാണ് ചിത്രം എത്തുന്നത്.ഗണിത ശാസ്ത്ര വിദഗ്ധനായാണ് ചിത്രത്തിൽ വിക്രം എത്തുക. പാവപ്പെട്ട കുട്ടികൾക്ക് കണക്ക് പഠിപ്പിച്ചു കൊടുക്കുന്ന അധ്യാപകനായ ഇദ്ദേഹം വിവിധ രാജ്യങ്ങൾ തേടുന്ന കുറ്റവാളി കൂടിയാണ് എന്നതാണ് ചിത്രത്തിൻ്റെ പ്ലോട്ട്.
ഇര്‍ഫാന്‍ പത്താന്റെ അരങ്ങേറ്റ സിനിമയായ കോബ്രയിൽ നായികയാകുന്നത് കെജിഎഫിലൂടെ പ്രശസ്തയായ ശ്രീനിഥി ഷെട്ടിയാണ്.കെ എസ് രവികുമാർ, ആനന്ദ്‍രാജ്, റോബോ ശങ്കർ, മൃണാളിനീ രവി, മീനാക്ഷി ഗോവിന്ദ്‍രാജൻ തുടങ്ങിയവരാണ് മറ്റ് അഭിനേതാക്കൾ.
എ ആർ റഹ്മാനാണ് ചിത്രത്തിനു സംഗീതം ഒരുക്കുക. സെവൻ സ്ക്രീൻ സ്റ്റുഡിയോസിൻറെ ബാനറിൽ എസ് എസ് ലളിത് കുമാർ നിർമ്മിക്കുന്ന ചിത്രത്തിൻ്റെ ഛായാഗ്രഹണം ഹരീഷ് കണ്ണൻ ആണ്. എഡിറ്റിംഗ് ഭുവൻ ശ്രീനിവാസൻ.
