ഈ വര്‍ഷത്തെ ഏറ്റവും മികച്ച ഡ്രാമ സീരിസിനുള്ള ഇന്റര്‍നാഷണല്‍ എമ്മി അവാര്‍ഡ് ഇന്ത്യന്‍ വെബ് സീരീസ് ഡല്‍ഹി ക്രൈമിന്.ഇന്റര്‍നാഷണല്‍ എമ്മി ലഭിക്കുന്ന ആദ്യത്തെ ഇന്ത്യന്‍ പരിപാടിയാണ് ഡല്‍ഹി ക്രൈം. ഇന്റര്‍നാഷണല്‍ എമ്മി അവാര്‍ഡ്‌സ് തന്നെയാണ് അവരുടെ ഔദ്യോഗിക ട്വിറ്റര്‍ പേജിലൂടെ അവാര്‍ഡ് കിട്ടിയതുമായി സംബന്ധിച്ച വിവരങ്ങള്‍ പുറത്തുവിട്ടിരിക്കുന്നത്.
2012 ഡിസംബറില്‍ ഡല്‍ഹിയില്‍ നടന്ന ക്രൂരമായ കൂട്ട ബലാത്സംഗത്തിന്റെ അന്വേഷണത്തെ ആസ്പദമാക്കി ചിത്രീകരിച്ചിരിക്കുന്ന ഡല്‍ഹി ക്രൈമില്‍, പ്രമുഖ നടി ഷെഫാലി ഷാഹ് ആണ് മുഖ്യ കഥാപാത്രമായ ഡിസിപി വര്‍ത്തിക ചതുര്‍വേദിയായി വേഷമിട്ടിരിക്കുന്നത്. ഏഴ് എപ്പിസോഡുകളുള്ള സീരിസില്‍ രസിക ദുഗ്ഗല്‍, രാജേഷ് രൈലാങ്, ആദില്‍ ഹുസൈന്‍ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ഹൃതിക് റോഷന്‍, വിദ്യ ബാലന്‍, ദീപിക പദുകോണ്‍, തപ്‌സി പന്നു തുടങ്ങിയ ബോളിവുഡ് താരങ്ങള്‍ ഡല്‍ഹി ക്രൈമിന്റെ മുഴുവന്‍ അണിയറപ്രവര്‍ത്തകര്‍ക്കും അഭിനേതാക്കള്‍ക്കും സാമൂഹിക മാധ്യമങ്ങളിലൂടെ അഭിനന്ദനമറിയിച്ചു.
