ഷൈന്‍ ടോം ചാക്കോ, രജിഷ വിജയന്‍ എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്ന ലവ് തിയേറ്ററുകളിലേക്ക്. അനുരാഗകരിക്കിന്‍ വെള്ളം, ഉണ്ട എന്നീ ചിത്രങ്ങള്‍ക്കു ശേഷം ഖാലിദ് റഹ്മാന്‍ സംവിധാനം ചെയ്യുന്ന ചിത്രം ജനുവരി 29നാണ് തിയേറ്ററുകളില്‍ എത്തുന്നത്.പൂര്‍ണ്ണമായും ലോക്ഡൗണില്‍ ചിത്രീകരിച്ച സിനിമ ഭാര്യാ-ഭര്‍ത്താക്കന്‍മാര്‍ തമ്മിലുള്ള സ്‌നേഹവും കലഹവുമൊക്കെയാണ് തുറന്നുകാണിക്കുന്നത്.
വീണ നന്ദകുമാര്‍, സുധി കോപ്പ, ജോണി ആന്റണി, ഗോകുലന്‍ തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ജിംഷി ഖാലിദ് ആണ് ഛായാഗ്രഹണം. ആഷിക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക് ഉസ്മാന്‍ ആണ് ചിത്രം നിര്‍മ്മിച്ചത്. ആഷിക് ഉസ്മാന്‍ പ്രൊഡക്ഷന്‍സിന്റെ പത്താമത്തെ ചിത്രമാണിത്. എക്‌സന്‍ ഗാരി പെരേരയും നേഹ എസ് നായരുമാണ് സംഗീത സംവിധാനം നിര്‍വ്വഹിച്ചത്.
ഖോ ഖോ ആണ് രജിഷ വിജയന്‍ നായികയായി എത്തുന്ന മറ്റൊരു ചിത്രം. രാഹുല്‍ റിജി നായര്‍ സംവിധാനം ചെയ്ത പെണ്‍കുട്ടികള്‍ മാത്രം പഠിക്കുന്ന ഒരു സ്‌ക്കൂളില്‍ ഖോ ഖോ കളിക്കാരുടെ ടീം ഉണ്ടാക്കുന്നതും തുടര്‍ന്നുണ്ടാകുന്ന പ്രശ്‌നങ്ങളുമാണ് അവതരിപ്പിക്കുന്നത്. സ്‌പോര്‍ട്‌സ് സിനിമയായി എത്തുന്ന ചിത്രത്തില്‍ ഒരു കായിക താരത്തിന്റെ വേഷത്തിലാണ് രജിഷ എത്തുന്നത്.
