ബോളിവുഡ് യുവതാരം വിക്കി കൗശലിന്റെ ഏറ്റവും പുതിയ സിനിമയായ ദ ഇമ്മോര്‍ട്ടല്‍ അശ്വത്ഥാമയുടെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. വിക്കി കൗശലിന്റെ സൂപ്പര്‍ ഹിറ്റ് ചിത്രമായ ഉറിയുടെ സംവിധായകന്‍ ആദിത്യ ധര്‍ ആണ് അശ്വത്ഥാമ സംവിധാനം ചെയ്യുന്നത്. റോണി സ്ക്രൂവാലയാണ് ചിത്രത്തിന്റെ നിര്‍മ്മാണം.
അശ്വത്വാമ എന്ന പുരാണ കഥാപാത്രത്തെ അവതരിപ്പിക്കുന്നതില്‍ വിക്കി കൗശല്‍ ആവേശത്തിലാണ്. തന്റെ കരിയറിലെ ഏറ്റവും വലിയ ചിത്രമാണ് ഇതെന്ന് താരം പറഞ്ഞു. സംവിധായകന്‍ ആദിത്യ ധറുമായുള്ള വിക്കി കൗശലിന്റെ രണ്ടാമത്തെ സഹകരണമാണ് ദി ഇമ്മോര്‍ട്ടല്‍ അശ്വതാമ. ആധുനിക കാലഘട്ടത്തില്‍ ഒരു സൂപ്പര്‍ഹീറോ ആക്ഷന്‍ ഫിലിം എന്ന നിലയില്‍ ആണ് ചിത്രം എത്തുന്നത്. ചിത്രത്തിന്റെ ഷൂട്ടിംഗ് ഈ വര്‍ഷം ഏപ്രിലില്‍ ആരംഭിക്കും. കൗരവ അധ്യാപകനായ ദ്രോണാചാര്യയുടെ മകന്‍ ആണ് അശ്വത്വാമ.
ഇന്ത്യന്‍ സിനിമയിലെ മാത്രമല്ല ലോക സിനിമയിലെ തന്നെ സൂപ്പര്‍ ഹീറോ ചിത്രങ്ങളുടെ നിലവാരം ഉയര്‍ത്തുന്നതായിരിക്കും ചിത്രമെന്നാണ് അണിയറ പ്രവര്‍ത്തകര്‍ പറയുന്നത്.
സാങ്കേതിക വിദ്യയുടെ കാര്യത്തിലും അഭിനയത്തിലും പുതിയ സാധ്യതകളാണ് ചിത്രം നല്‍കുന്നതെന്ന് വിക്കി പറയുന്നു. ഈ വര്‍ഷം ഏപ്രിലില്‍ തന്നെ സിനിമയുടെ ചിത്രീകരണം ആരംഭിക്കുമെന്നാണ് സംവിധായകന്‍ അറിയിക്കുന്നത്.
